ወያኔ ታ ሚኖሩ አባላቱንና ደጋፊዎቹን በአዲስ አበባ ምርጫ ሊያሳትፍ መሆኑ ታወቀ April 2, 2013 | Fil

ዘረኛዉ የወያኔ አገዛዝ ካድሬዎቹን በየቀበሌዉ እየላከ የአዲስ አበባን ነዋሪዎች ለምርጫ ካልተመዘገባችሁ እያለ ቢያስፈራራም በመጪው ሚያዚያ ወር ለሚካሄደው የአዲስ አበባና የወረዳ ምርጫዎች የተመዘገበው መራጭ ቁጥር ከተጠበቀው በታች በመውረዱ ወያኔ ከክልል ከተሞች የራሱን ደጋፊዎች በማስመጣት በምርጫው እንዲሳተፉ ዛሬ ስልጠና መስጠት መጀመሩን የግንቦት ሰባት ምንጮች ከአዲሰ አበባ በላኩልን ዜና ገለጹ። ከተለያዩ ክልሎች የመጡ የወያኔ ደጋፊዎች አዲስ አበባ ዉስጥ በተለያዩ የስልጠና ጣቢያዎች በመጪው ምርጫ እንዴት ድምጽ እንደሚሰጡ ስልጠና እየተሰጣቸው ይገኛሉ ያሉት ዘጋቢዎቻችን በንፋስ ስልክ ላፍቶ ክፍለ ከተማ “ነጻነት” እየተባለ በሚጠራዉ ትምህርት ቤት ዉስጥ 600 ሰልጣኖች ቴክኒካዊ የሆኑ ነገሮችን ሲማሩ መዋላቸውንና በምርጫው እለት ወደ አዲስ አበባ ሲመጡ ግር እንዳይላቸው አስፈላጊው ስልጠና የተሰጣቸዉ መሆኑን አክልዉ ተናግረዋል።

ባለፈዉ ሳምንት መጨረሻ ላይ በተሰጠው በዚህ ስልጠና ከ5 ሺ ያለነሱ ከየክልሉ ተውጣጥተው የመጡ የገዢው ፓርቲ አባላት የተሳተፉ ሲሆን ምርጫዉ ከመጀመሩ በፊት ብዙ ተከታታይ ስልጠና ለመስጠት ዝግጅቱ መጠናቀቁን ለማወቅ ተችሏል። ወያኔ/ኢህአዴግ ያለምንም ተፎካካሪ ብቻዉን ወይም ከራሱ ጋር በሚወዳደርበት ምርጫ የመራጩ ቁጥር ጨመረ አልጨመረ ለምን እንደሚጨነቅ ለግዜዉ ማወቅ ባይቻልም እንደ ብዙ ምዕራባዉያንና የአገር ዉስጥ ፖለቲካ ተንታኞች ግምት ወያኔ የሚጨነቀዉ ላልመረጥ እችላለሁ በሚል ስጋት ሳይሆን የመራጩ ቁጥር በቀነሰ ቁጥር ከጌቶቹ ከምዕራባዉያን ሊመጣ የሚችለዉን ጥያቄ በመፍራት ነዉ። ከዚህ በተጨማሪ ወያኔ እንደለመደዉ 99% ድምጽ አገኘሁ ለማለት የመራጩ ቁጥር ከፍ እንዲልለት ይፈልጋል እንጂ የምርጫዉ ዉጤትማ ከአሁኑ የታወቀ ነዉ ሲሉ አንድ ስማቸዉ እንዳይገለጽ የፈለጉ የፖለቲካ ፓርቲ መሪ ተናግረዋል። እኚህ ፓርቲያቸዉ ምርጫዉ እንደማይሳተፍ የነገሩን የተቃዋሚ ፓርቲ መሪ ወያኔን ለመጣል አማራጩ ምርጫ ሳይሆን ህዝባዊ አመጽ ብቻ ነዉ ብለዋል።